''සරම්ප යැයි සැක නම් වහාම වාර්තා කරන්න'' සෞඛ්‍ය අංශවලින් විශේෂ දැනුම්දීමක්..|Hiru TV Blog

''සරම්ප යැයි සැක නම් වහාම වාර්තා කරන්න'' සෞඛ්‍ය අංශවලින් විශේෂ දැනුම්දීමක්..

Wednesday, 29 April 2026 - 11:46 | Views - 79

වසරකට අධික කාලයකට පසුව මෙරටින් සරම්ප රෝගීන් වාර්තා වීමත් සමඟ සෞඛ්‍ය අමාත්‍යාංශය විසින් දිවයිනේ සියලුම වෛද්‍යවරුන්වෙත විශේෂ නියෝගයක් නිකුත්කරලා තිබෙනවා.

ඒ අනුව, සරම්ප රෝගය යැයි සැකකළ හැකි ඕනෑම රෝගියෙකු පිළිබඳව ජාතික නිරීක්ෂණ පද්ධතිය හරහා වහාම වාර්තාකරන ලෙස දැනුම්දී තිබෙනවා.

රෝගී තත්ත්වය පැතිරීම වැළැක්වීම සඳහා මේ පියවරගත් බව වසංගත රෝග විද්‍යා ඒකකයේ ප්‍රජා වෛද්‍ය විශේෂඥ අතුල ලියනපතිරණ සඳහන්කළා.

උණ සමඟ සමේ පලු දැමීම හෝ රතු පැහැති ලප (Rashes) සහිත රෝගීන් පැමිණියහොත් ඔවුන්ව වැඩිදුර අධීක්ෂණය සඳහා රජයේ රෝහල්වෙත යොමුකරන ලෙස පෞද්ගලික අංශයේ වෛද්‍යවරුන් වෙත උපදෙස් ලබාදෙමින් ඔහු පවසා තිබෙනවා.

සරම්ප පැතිරීම පාලනය කිරීමට ඇති එකම විසඳුම එන්නත්කරණය බව සෞඛ්‍ය අංශ පෙන්වාදෙන අතර දරුවන්ගේ එන්නත් මාත්‍රාවන් නිසි පරිදි ලබාදී ඇත්දැයි පරීක්ෂාකරන ලෙස දෙමාපියන්ගෙන් ඉල්ලා සිටිනවා.

මාස 9 සිට අවුරුදු 3 දක්වා: අවම වශයෙන් එක් මාත්‍රාවක් ලබාගත යුතුය.

අවුරුදු 3 සිට 15 දක්වා: එන්නත් මාත්‍රාවන් දෙකම සම්පූර්ණකර තිබිය යුතුය.

පසුගිය වසරේ ජනවාරි මාසයෙන් පසුව මෙරටින් සරම්ප රෝගීන් වාර්තාවී නොතිබුණත්, පසුගිය මාසයේදී රෝගීන් දෙදෙනෙකු අලුතින් හඳුනාගෙන තිබෙනවා.

මේ රෝගීන් දෙදෙනාම විදේශගතව සිට මෙරටට පැමිණි අය බව සෞඛ්‍ය බලධාරීන් තහවුරු කළා.

තමන්ට හෝ තම දරුවන්ට උණ සමඟ සමේ පලු දැමීමක් වැනි රෝග ලක්ෂණ පවතී නම්, ප්‍රමාද නොවී වහාම වෛද්‍ය ප්‍රතිකාර ලබාගන්නා ලෙස සෞඛ්‍ය අංශ මහජනතාවගෙන් දැඩිව ඉල්ලා සිටිනවා.