බ්‍රිතාන්‍ය සෞඛ්‍ය සේවයේ ශීතකරණ තුළ ඇති එන්නත්වලට චීන හැකර් තර්ජනයක්?|Hiru TV Blog

බ්‍රිතාන්‍ය සෞඛ්‍ය සේවයේ ශීතකරණ තුළ ඇති එන්නත්වලට චීන හැකර් තර්ජනයක්?

Friday, 17 April 2026 - 8:05 | Views - 64

අද වනවිට අප අවට ඇති බොහෝ දේවල් අන්තර්ජාලය සමඟ සම්බන්ධ වෙලා තිබෙනවා.

රෝහල්වල ඇති අතිනවීන ශීතකරණ පද්ධති පවා මේ වනවිට අන්තර්ජාලයට සම්බන්ධ කර ඇත්තේ කාර්ය මණ්ඩලයේ පහසුව සඳහායි.

නමුත් මෙම පහසුව පිටුපස බරපතළ ආරක්ෂක අවදානමක් සැඟවී තිබෙන බව බ්‍රිතාන්‍යයෙන් වාර්තා වන පුවත් මඟින් අනාවරණය වෙලා තිබෙනවා.

බ්‍රිතාන්‍යයේ පාර්ලිමේන්තු මන්ත්‍රීවරුන් පෙන්වා දෙන්නේ රෝහල් ශීතකරණ අන්තර්ජාලයට සම්බන්ධ කරන සෙලියුලර් ඉන්ටර්නෙට්-ඕෆ්-තින්ග්ස් මොඩියුල (CIMs) නමැති කුඩා උපාංග බොහෝ විට චීනයේ නිෂ්පාදිත ඒවා බවයි.

මෙම උපාංග හරහා චීන පාලනයට හෝ හැකර්වරුන්ට දුරස්ථව සිට ශීතකරණ පද්ධතිවලට රහසිගතව ඇතුළු වීමේ තාක්ෂණික හැකියාවක් පවතින බවට ‘සුරක්ෂිත තාක්ෂණය පිළිබඳ සන්ධානය’ (Coalition on Secure Technology) අනතුරු අඟවලා තිබෙනවා.

වෛද්‍ය ශීතකරණ තුළ ගබඩා කර තිබෙන එන්නත්, රුධිර සාම්පල සහ ඖෂධ ඉතා නිවැරදි උෂ්ණත්වයක පවත්වා ගත යුතුයි.

හැකර්වරයෙකු මෙම පද්ධතියට ඇතුළු වුවහොත් ඔවුන්ට උෂ්ණත්වය වෙනස් කිරීමට හෝ ශීතකරණ ක්‍රියාවිරහිත කිරීමට හැකියාව තිබෙනවා.

ඒ වගේම පද්ධතියේ දෝෂයක් ඇති වූ විට නිකුත්වන අනතුරු ඇඟවීමේ සංඥා (Alarms) අක්‍රියකළ හැකියි. උෂ්ණත්වය නිවැරදිව පවතින බව පෙන්වීමට දත්ත ව්‍යාජ ලෙස සැකසීමත් (Spoofing) පුළුවන්.

මෙහි භයානකම තත්ත්වය වන්නේ, සෞඛ්‍ය කාර්ය මණ්ඩලය සියල්ල නිවැරදි යැයි සිතා සිටියදී පවා එන්නත්වල ගුණාත්මකභාවය විනාශ වී තිබීමට ඉඩ තිබීමයි.

මෙය රෝගීන්ගේ ජීවිත සෘජුවම අවදානමට ලක් කරන ක්‍රියාවක් ලෙස සැලකෙනවා.

සෞඛ්‍ය සේවය මෙවැනි තීරණාත්මක කටයුතු සඳහා චීන නිෂ්පාදිත උපාංග මත පමණට වඩා යැපීම මහජනතාවට පවතින පැහැදිලි හා ආසන්න අනතුරක් බව ලේබර් පක්ෂ පාර්ලිමේන්තු මන්ත්‍රී ග්‍රේම් ඩව්නි පවසනවා.

තාක්ෂණයෙන් වැඩ ලේසි වුවත්, ඒ හරහා සතුරු පාර්ශවයන්ට රටක සෞඛ්‍ය පද්ධතියකට හානි කිරීමට ඉඩ ලැබීම ඉතා බරපතළ කරුණක්.

මේ නිසා අනාගතයේදී තාක්ෂණික උපාංග මිලදී ගැනීමේදී ආරක්ෂාව පිළිබඳව මීට වඩා දැඩි වගකීමකින් කටයුතු කළයුතු බවට විශේෂඥයන් මත පළකර තිබෙනවා.