සිංහල අවුරුද්දේ නිරෝගීකමේ රහස.. ලෙඩ රෝග දුරලන හිස තෙල් ගෑමේ චාරිත්‍රය..|Hiru TV Blog

සිංහල අවුරුද්දේ නිරෝගීකමේ රහස.. ලෙඩ රෝග දුරලන හිස තෙල් ගෑමේ චාරිත්‍රය..

Wednesday, 15 April 2026 - 7:53 | Views - 95

සිංහල හා හින්දු අලුත් අවුරුදු චාරිත්‍ර වාරිත්‍ර අතර වඩාත්ම වැදගත් සෞඛ්‍යමය වටිනාකමක් ඇති චාරිත්‍රය වන්නේ හිස තෙල් ගෑමේ චාරිත්‍රයයි.

මෙය හුදෙක් ආගමික හෝ සංස්කෘතික වැඩසටහනක් පමණක් නොව, ගැඹුරු ආයුර්වේද විද්‍යාත්මක පදනමක් සහිත උළෙලකි.

ආයුර්වේදයට අනුව මිනිස් සිරුරේ ප්‍රධානම අවයවය වන්නේ හිසයි. හිස තෙල් ගෑම මඟින් ශරීරයේ උෂ්ණත්වය පාලනය කරමින්, ස්නායු පද්ධතිය උත්තේජනය කර නිරෝගීකම ළඟාකර දෙනවා.

මේ චාරිත්‍රයෙන් එළඹෙන වසර පුරා රෝග පීඩාවලින් තොරව ජීවත් වීමට ආශීර්වාදය ලබා ගන්නා අතරම මේ ඖෂධීය තෙල් මඟින් මොළයේ ක්‍රියාකාරිත්වය හා මතක ශක්තියද වර්ධනය කරනවා.

අලුත් අවුරුද්දේ සූර්යයා මීන රාශියෙන් මේෂ රාශියට සංක්‍රමණය වීමත් සමඟ මිනිස් සිරුරට ඇතිවන බලපෑම සමනය කිරීම මෙහි අරමුණයි.

හිස තෙල් ගෑමේ චාරිත්‍රය සම්බන්ධයෙන් අතීතයේ සිට පැවත එන රසවත් කතාවක් තිබේ.

පුරාවෘත්තයන්ට අනුව, අලුත් අවුරුදු කුමාරයා පොළොවට වැඩම කරන විට ඇතිවන මහා තේජස නිසා පරිසරය හා සත්ත්ව සමූහයා දැඩි රස්නය නිසා පීඩාවට පත්වෙනවා.

මෙම රස්නයෙන් මිදී සිසිලස ලබාගැනීම සඳහාත්, ස්වභාවධර්මයා සමඟ එකඟතාවයෙන් ජීවත් වීමටත් මිනිසාට හිස තෙල් ගා ස්නානය කරන ලෙස දේව නියෝගයක් ලැබුණු බව ජනප්‍රවාදයේ සඳහන් වෙනවා.

ඒ වගේම ලංකාවේ රජවරුන් විසින් රාජකීය වෛද්‍යවරුන් ලවා ඖෂධීය තෙල් වර්ග සාදවා, සුබ නැකතට රටවැසියාට සෙත්පතා මේ චාරිත්‍රය ඉටුකරලා තිබෙනවා.