පිළිකාව, බොහෝ දෙනා තුළ බියක් ඇති කරන තවත් එක් රෝගී තත්වයක්.

ඕනෑම අනපේක්ෂිත මොහොතක පිළිකාව නිසා ජීවිතයක් නැතිවෙන්න පුළුවන්. මේ කියන්න යන්නේ අන්න ඒ ගැන ඇසෙන වෙනස්ම කතාවක්. 

වෛද්‍ය විද්‍යාවේ මෑතකාලීන විශාලතම පෙරළියක් ලෙස සැලකෙන හිස්ටොට්‍රිප්සි (Histotripsy) තාක්ෂණය, පිළිකා රෝගීන්ට නව බලාපොරොත්තුවක් ගෙන දී තිබෙනවා.

අමෙරිකාවේ මිචිගන් විශ්වවිද්‍යාලයේ (University of Michigan) පර්යේෂකයින් විසින් වැඩිදියුණු කරන ලද මෙම ක්‍රමය හරහා සිරුර කැපීමකින් තොරව අක්මා පිළිකා විනාශ කිරීමේ හැකියාව දැන් උදාවී තිබෙනවා.

සාම්ප්‍රදායික පිළිකා ප්‍රතිකාර ක්‍රම වන ශල්‍යකර්ම, විකිරණ ප්‍රතිකාර (Radiation) හෝ රසායනික ප්‍රතිකාර (Chemotherapy) වලට වඩා මෙය සම්පූර්ණයෙන්ම වෙනස් මඟක් ගන්නවා.

මෙහිදී ඉහළ තීව්‍රතාවයකින් යුත් ධ්වනි තරංග (Sound waves) පිළිකා සෛල වෙත එල්ල කරනු ලබයි. මෙම තරංග මගින් පිළිකා සෛල තුළ ඉතා කුඩා වායු බුබුළු සමූහයක් නිර්මාණය කරනවා.

මෙම බුබුළු පිපිරී යාමෙන් ඇතිවන දැඩි පීඩනය නිසා පිළිකා සෛලීය මට්ටමින් දියවී විනාශ වී යයි.

පිළිකා සෛල මෙලෙස දියවූ පසු, අපගේ සිරුරේ ඇති ස්වාභාවික ප්‍රතිශක්තිකරණ පද්ධතිය මගින් එම අපද්‍රව්‍ය හඳුනාගෙන ශරීරයෙන් ඉවත් කරනු ලබනවා.