දඩ මුදල රුපියල් 5,000ත්, 10,000ත් අතර අගයකින් ඉහළට ?|Hiru TV Blog

දඩ මුදල රුපියල් 5,000ත්, 10,000ත් අතර අගයකින් ඉහළට ?

Sunday, 09 April 2023 - 7:44 | Views - 327

ප්‍රවේශපත්‍ර නොමැතිව දුම්රියේ ගමන් ගන්නා මගීන්ගේ වැඩිවීමක් නිරීක්ෂණය කරන බව දුම්රිය දෙපාර්තමේන්තුව පවසනවා.

බස් ගාස්තුවට සාපේක්ෂව අඩු මුදලක් අය කෙරෙන දුම්රිය සේවය තුළින් ගමන් පහසුකම් ලබාගන්නා මගීන් එලෙස කටයුතු කිරීමෙන් දෙපාර්තමේන්තුවේ ආදායම තවදුරටත් පහත වැටෙන බවයි එහි උසස් නිලධාරියෙකු සඳහන් කළේ.

ඒ හේතුවෙන් ප්‍රවේශපත්‍ර නොමැතිව දුම්රියේ ගමන් ගන්නා මගීන්ගෙන් අය කෙරෙන දඩ මුදල ඉහළ දැමීම පිළිබඳව දුම්රිය දෙපාර්තමේන්තුවේ අවධානය යොමුව තිබෙනවා.

දැනට එලෙස ගමන් කරන මගියෙකුගෙන් ගමන් ගාස්තුව මෙන් දෙගුණයක් සහ රුපියල් 3,000ක දඩ මුදලකුයි අය කෙරෙන්නේ.

කෙසේ වෙතත්, එම දඩ මුදල රුපියල් 5,000ත්, 10,000ත් අතර අගයක් දක්වා ඉහළ දැමිය යුතු බවයි දුම්රිය දෙපාර්තමේන්තුවේ උසස් නිලධාරීයා වැඩිදුරටත් සඳහන් කළේ.

දුම්රියේ මුදල් නොගෙවා යන මගීන් පරීක්ෂා කිරීමේ කටයුතු සඳහා ප්‍රවේශපත්‍ර පරීක්ෂකවරුන්ගේ හිඟය ද බලපෑම් එල්ල කර ඇති බව සඳහන්.

මේ වනවිට දුම්රිය දෙපාර්තමේන්තුව මාසිකව ලබන ආදායම රුපියල් ලක්ෂ 1,300ක්.

මේ අතර, ශ්‍රී ලංකා ගමනාගමන මණ්ඩලය, මුදල් අමාත්‍යාංශය සමඟ ගිවිසුමකට එළැඹ ඇති බව ප්‍රවාහන හා මහාමාර්ග සහ ජනමාධ්‍ය අමාත්‍ය බන්දුල ගුණවර්ධන පවසනවා.

මහනුවර ඊයේ (08) පැවති උත්සවයකට එක්වෙමින් අමාත්‍යවරයා කියා සිටියේ ඒ අනුව වසර 2025 වනවිට ශ්‍රී ලංගම අලාභ නොවන තත්ත්වයට පවත්වාගෙන යා යුතු බවයි.

Share This Article