මාමාගේ සුපිරි මෝටර් රථයට යට වී පුංචි දියණියක් අවසන් ගමනේ.. (Photos)|Hiru TV Blog

මාමාගේ සුපිරි මෝටර් රථයට යට වී පුංචි දියණියක් අවසන් ගමනේ.. (Photos)

Saturday, 18 February 2023 - 10:15 | Views - 6,544

කෝටිපති ව්‍යාපාරික මාමා පැදවූ සුඛෝපභෝගි මෝටර් රථයට යට වීමෙන් වයස අවුරුදු එකහමාරක දැරියක මිය ගොස් ඇති බව කොහුවල පොලිසිය කියයි.

මෙලෙස අවාසනාවන්ත ලෙස මියගොස් ඇත්තේ කොහුවල කලුබෝවිල පී. රූබන් පීරිස් මාවතේ පදිංචිව සිටි සුවයිරා මොහොමඩ් මුස්තාක් දැරියයි.

මෝටර් රථය පැදවූ දැරියගේ මවගේ සහෝදරයා වන 28 හැවිරිදි කෝටිපති ව්‍යාපාරික සැකකරු අත්අඩංගුවට ගෙන, ඔහුගේ සුඛෝපභෝගි මෝටර් රථය පොලිස් භාරයට ගෙන ඇත.

සැකකරු පෙරේදා (16) දහවල් ආගමික වතාවත්වල යෙදීම සඳහා නිවෙසින් පිට වී යෑමට සූදානම්ව මෝටර් රථය නිවෙස ඉදිරිපිට ගරාජයෙන් පිටතට ගැනීමේදී රියේ ඉදිරිපසට පැමිණි දැරිය බෆරයට සහ පොළොවට තෙරපීමෙන් අනතුර වී ඇතැයි පොලිස් විමර්ශනවලදී අනාවරණය වී ඇත.

අනතුර සියැසින් දුටු නිවෙසට පැමිණ යතුරුපැදියෙන් පිටවීමට ගිය පුද්ගලයකු ඒ බව සැකකාර රියැදුරුට දැනුම් දීමත් සමඟ ඔහු මෝටර් රථය ආපස්සට ගෙන ඇති අතර, දැරිය නැවතත් මෝටර් රථයේ බෆරය සහ පොළොව අතර තෙරපී ඇතැයි පොලිසිය කියයි.

වහා ක්‍රියාත්මක වූ නිවැසියන් දැරිය කළුබෝවිල ශික්ෂණ රෝහලට ඇතුළත් කිරීමෙන් අනතුරුව මූලික ප්‍රතිකාර ලබා දී කොළඹ ජාතික රෝහල වෙත ඇතුළත් කිරීමෙන් අනතුරුව ඊයේ 17 අලුයම මියගොස් තිබූ බව පොලිස් නිලධාරියෙක් පැවසීය.

අනතුර සිදු වන ආකාරය නිවෙසේ සවි කර තිබූ සීසීටීවී කැමරාවේ මනාව සටහන්ව ඇතැයිද පොලිස් නිලධාරියා වැඩිදුරටත් පැවසීය.

අනතුර සිදු වූ ස්ථානයේ කිසිදු ලේ පැල්ලමක් දක්නට නැතැයි පොලීසිය කියයි.

සිද්ධිය වූ ස්ථානයට පැමිණි ගල්කිස්ස අධිකරණයේ වැඩ බලන මහේස්ත්‍රාත් රත්නා ගමගේ මහත්මිය මූලික පරීක්ෂණ සිදු කර මෝටර් රථය පොලිස් භාරයට ගෙන සැකකරු අත්අඩංගුවට ගෙන අධිකරණයට ඉදිරිපත් කරන ලෙස නියෝග කළාය.

කොහුවල පොලිසියේ ස්ථානාධිපති ප්‍රධාන පොලිස් පරීක්ෂක වසන්ත පිටිගල මහතාගේ උපදෙස් මත විවිධ පැමිණිලි අංශයේ ස්ථානාධිපති පොලිස් පරීක්ෂක ආර්.ඩී. චන්ද්‍රසේන, පොලිස් සැරයන් ප්‍රභාත් (71426), පොලිස් කොස්තාපල් ගිම්හාන (92444) පරීක්ෂණ පවත්වති.