ප්‍රමිතියෙන් තොර මධ්‍යසාර ගැන හොයන්න - මෙවර අයවැය මුලපුරයි|Hiru TV Blog

ප්‍රමිතියෙන් තොර මධ්‍යසාර ගැන හොයන්න - මෙවර අයවැය මුලපුරයි

Friday, 18 November 2022 - 17:44 | Views - 1,129

මිනිස් පරිභෝජනයට නුසුදුසු මධ්‍යසාර හඳුනා ගැනීම සහ ඊට එරෙහිව නීතිය ක්‍රියාත්මක කිරීම සඳහා සුරා බදු දෙපාර්තමේන්තුව යටතේ ම වෙනම රසායනාගාරයක් ස්ථාපනය කිරීමට මෙවර අයවැය මගින් යෝජනා කර ඇතැයි මුදල් රාජ්‍ය අමාත්‍ය ආචාර්ය රංජිත් සියඹලාපිටිය පවසනවා.

රාජ්‍ය අමාත්‍යවරයා මේ බව කියා සිටියේ සමස්ත ලංකා සුරාබදු සැරයන් සහ නියාමක සංගමයේ 70 වන වාර්ෂික සම්මේලනයට අද (18) එක්වෙමින්.

එහි දී අමාත්‍යවරයා පෙන්වා දුන්නේ මෙම රසායනාගාරය ස්ථාපිත කිරීමෙන් අනතුරුව, ප්‍රමාදයකින් තොරව මධ්‍යසාරවල ගුණාත්මකභාවය හඳුනා ගැනීමේ හැකියාව ලැබෙන බැවින් ඒවා සමාජ ගත වීම කඩිනමින් වැලැක්විය හැකි බවයි.

“මෙවර අයවැය මගින් අපි සුරා බදු දෙපාර්තමේන්තුව සඳහා ම වෙනම රසායනාගාරයක් ඉදිකිරීම සඳහා රුපියල් මිලියන 100ක් වෙන් කරල තියෙනවා. මේක කාලාන්තරයක් තිස්සේ තිබුණ ඉල්ලීමක්. දැනට සුරාවල ප්‍රමිතිය සම්බන්ධ කටයුතු රස පරීක්ෂක දෙපාර්තමේන්තුව හරහා සිදු වන බැවින් කාර්ය බහුලත්වයත් එක්ක ප්‍රමාදයක් සහිතව තමයි ඒ කටයුතු සිදු වෙන්නේ. ” යැයි අමාත්‍යවරයා එහි දී පැවැසුවා.

2023 අයවැය යෝජනාවලිය සම්බන්ධයෙන් ද අමාත්‍යවරයා මෙහි දී අදහස් පළ කළ අතර ඔහු කියා සිටියේ, “මෙවර අයවැයේ සඳහා රජයේ වියදම රුපියල් බිලියන 7800ක්. එය පසුගිය වසරේ විදයම ලෙස සටහන් වූ රුපියල් බිලියන 6100ට වඩා 30%ක ඉහළ යාමක්. රජයට වැඩිම ආදායම් හොයල දෙන ලැයිස්තුවේ තුන් වැනි තැන ඉන්න සුරා බදු දෙපාර්තමේන්තුවේ සුවිශේෂී නිලධාරීන් වන ඔබ ඒ වෙනුවෙන් පුළුල් කාර්යභාරයක් ඉටු කරමින් ඉන්නවා. අපි මාසෙකට රජයේ වැටුප් බිල විදියට රුපියල් බිලියන 92ක් හොයන්න ඕනෙ. විශ්‍රාම වැටුප් සඳහා රුපියල් බිලියන 26ක් හොයන්න ඕනෙ.” යනුවෙන්.