විශ්‍රාම යෑමක් හේතුවෙන් සුරාබදු දෙපාර්තමේන්තුවේ ගැටළුකාරී තත්ත්වයක්|Hiru TV Blog

විශ්‍රාම යෑමක් හේතුවෙන් සුරාබදු දෙපාර්තමේන්තුවේ ගැටළුකාරී තත්ත්වයක්

Sunday, 06 November 2022 - 14:53 | Views - 640

සුරාබදු දෙපාර්තමේන්තුවේ පළපුරුදු උසස් නිලධාරීන් 21 දෙනෙකු මේ වසර අවසානයේදී විශ්‍රාම ගැනීමට නියමිතව ඇතැයි වාර්තා පෙන්වා දෙනවා.

මේ පිරිසට එසේ විශ්‍රාම ගැනීමට සිදුව ඇත්තේ රජයේ නිලධාරීන්ගේ විශ්‍රාම යාමේ වයස අවුරුදු 65 සිට 60 දක්වා අඩු කිරීමට රජය ගත් ප්‍රතිපත්තිමය තීරණය හේතුවෙන් බවටයි සඳහන් වන්නේ.

උසස් නිලධාරින් විශාල ප්‍රමාණයක් මෙලෙස එකවර විශ්‍රාම යෑම හේතුවෙන් එම දෙපාර්තමේන්තුවේ පරිපාලන කටයුතු පවත්වාගෙන යෑමට දැඩි බාධාකාරී තත්වයක් මතු වනු ඇතැයි දෙපාර්තමේන්තු ආරංචි මාර්ග සඳහන් කළා.

කෙසේ වෙතත්, වසර අවසානයේදී මෙලෙස විශ්‍රාම යෑමට නියමිතව සිටින පිරිසට අතිරේක සුරාබදු කොමසාරිස් ජනරාල්, සුරාබදු කොමසාරිස්, නියෝජ්‍ය සුරාබදු කොමසාරිස්, සහකාර සුරාබදු කොමසාරිස් සහ සුරාබදු අධිකාරි යන නිලයන් දරන අය ද ඇතුළත් බවටයි වැඩිදුරටත් සඳහන්.

මේ වන විට පුරප්පාඩු පිරවීම සඳහා රාජ්‍ය සේවා කොමිෂන් සභාවට දැනුම්දී ඇතත් ඒ කටයුතු දිගින් දිගටම ප්‍රමාද වෙමින් පවතින බව සුරාබදු දෙපාර්තමේන්තුව පවසා සිටියා.

එසේම, මෙම ගැටළුව සම්බන්ධයෙන් විශේෂ අවධානයක් යොමුකර ඇති බව ද එම රජයේ අභ්‍යන්තර ආරංචි මාර්ග සඳහන් කළා.

( උපුටා ගැනීම - ලංකාදීප )

Share This Article