විරෝධතාවට අවසර නෑ - පොලිසියෙන් ලිපියක්|Hiru TV Blog

විරෝධතාවට අවසර නෑ - පොලිසියෙන් ලිපියක්

Wednesday, 02 November 2022 - 12:06 | Views - 636

දේශපාලන පක්ෂ, වෘත්තීය සමිති සහ බහුජන සංවිධානය ඒකාබද්ධව අද (02) පස්වරුවේ කොළඹ දී පැවැත්වීමට සූදානම් විරෝධතාව කොටුව දුම්රියපොළ ඉදිරිපිට හෝ ඒ ආසන්නයේ පැවැත්වීමට අවසර නො දෙන බව ඊට සහභාගී වන පාර්ශ්වවලට දැනුම් දෙමින් පොලිසිය ලිපියක් නිකුත් කර තිබෙනවා.

කොළඹ මධ්‍යම 2 කොට්ඨාසය භාර සහකාර පොලිස් අධිකාරී කේ.ඒ.ඊ. එන්. දිල්රුක්ගේ අස්සනින් නිකුත් කර ඇති මේ ලිපිය භාර දීම සඳහා අද අලුයම සිට පොලිස් නිලධාරීන් විරෝධතාවට සහභාගී වීමට සූදානම් වන පාර්ශව සිටින නිවාස සහ කාර්යාලවලට ගොස් තිබුණු බව සඳහන්.

මෙවැනි ලිපියක් යැවූ බවට පොලිසිය තහවුරු කළ බව යි ආරංචි මාර්ග පවසන්නේ.

සහකාර පොලිස් අධිකාරීවරයාගේ ලිපියේ සඳහන් වන්නේ, මෙම විරෝධතාව පැවැත්වෙන කාල සීමාවේ මාර්ග අවහිර වීම නිසා රාජ්‍ය හා පෞද්ගලික ආයතනවල සේවය අවසන් කර යන ජනතාවට මෙන්ම කොටුව සහ පිටකොටුව තොග වෙළෙඳාමට ද අවහිරතා ඇති විය හැකි බව යි.

විරෝධතාව නිසා ඇති වන වාහන තදබදයෙන් ප්‍රවාහන කටයුතු අඩාල වීම නිසා කටුනායක, බියගම, වතුපිටිවල හා මහනුවර ආදි ආර්ථික කලාපවල සිට කොළඹ වරායට බහාලුම් රැගෙන ඒමේ දී නියමිත කාලයට නැව්ගත කර නො හැකි වීමෙන් ආර්ථික බලපෑමක් ද ඇති වන බව යි මෙම ලිපියේ සඳහන් වන්නේ.

ලිපියේ වැඩිදුරටත් සඳහන් වන්නේ, විරෝධතාව නිසා මාර්ග අවහිර වීමෙන් සංචාරකයන්ට ද පීඩාවක් හා අවහිරයක් සිදු වන බව යි.

පොලිස් අඥා පනතේ 80 වැනි වගන්තිය යටතේ ග්‍රැමෆෝනයක්, ශබ්ධ විකාශන යන්ත්‍රයක් හෝ මෙගාෆෝනයක් හෝ ඇම්ප්ලිෆියරයක් හෝ යන්ත්‍රාණුසාරයෙන් හෝ ශබ්ධය නිපදවන හෝ නැවත නිපදවන හෝ විශාල කරන වෙනත් උපකරණයක් භාවිත කිරීමට සහකාර පොලිස් අධිකාරීවරයෙකුගේ අවසරය ගත යුතු වුවත් එවැනි අවසරයක් ද ලබා ගෙන නැතැ යි මෙම ලිපියේ සඳහන්.

එහි වැඩිදුරටත් සඳහන් කර ඇත්තේ, මාර්ග අවහිර වීමක් හෝ බාධා වීමක් සිදු වුව හොත් ජනතාවට වන පීඩා ඉවත් කිරීමට පොලිස් අඥා පනතේ සහ වෙනත් නීති යටතේ ක්‍රියාමාර්ග ගැනීමට සිදු වන බව යි.

Share This Article