වීදි වෙළඳුන්ගෙන් බදු අයකිරීමේ තීන්දුව ?|Hiru TV Blog

වීදි වෙළඳුන්ගෙන් බදු අයකිරීමේ තීන්දුව ?

Friday, 28 October 2022 - 10:44 | Views - 1,614

මාර්ග සංවර්ධන අධිකාරියට අයත් මාර්ග ආසන්නයේ පවත්වාගෙන යන බඩ ඉරිඟු, ලොතරැයි සහ එළවළු අලෙවි කරන්නන්ගෙන් මුදල් අයකිරීමේ තීරණය ක්‍රියාවට නංවා නොමැති බව එම අධිකාරිය පවසනවා.

එහි උසස් නිලධාරියෙකු සඳහන් කළේ එවැනි හැකියාවක් පවතින්නේ ද යන්න සම්බන්ධයෙන් සාකච්ඡාවට ලක් කෙරුණත්, එය ප්‍රායෝගිකව ක්‍රියාවට නැංවීමේදී ගැටළු රැසකට මුහුණපෑමට සිදුවනු ඇති බවයි.

ඒ හේතුවෙන් එලෙස මහාමාර්ග ආසන්නයේ වෙළඳාමේ නිරතවන පුද්ගලයින්ගෙන් යම් අය කිරීමක් සිදුකිරීමේ තීරණය මේ දක්වා ක්‍රියාවට නංවා නොමැති බවද එම උසස් නිලධාරීයා වැඩිදුරටත් පෙන්වා දුන්නා.

කෙසේ වෙතත්, ඊයේ (27) රජරට දූෂණ විරෝධී සංගමය චෝදනා කළේ මාර්ග සංවර්ධන අධිකාරියට අයත් මාර්ග ආසන්නයේ පවත්වාගෙන යන බඩ ඉරිඟු, ලොතරැයි සහ එළවළු අලෙවි කරන්නන්ගෙන් මාර්ග සංවර්ධන අධිකාරිය බද්දක් පනවා ඇති බවටයි.

එම අලෙවිස්ථානයේ භූමි ප්‍රමාණය, වර්ග අඩි පහක් නම් ඒ සඳහා මාසිකව රුපියල් 2000 ක මුදලක් ලබා දිය යුතු බවත් සෑම වැඩිවන වර්ග අඩි පහකටම රුපියල් 2000 බැගින් අය කරන බවත් මාර්ග සංවර්ධන අධිකාරිය දැනුම් දී තිබුණා.

මීට අමතරව, ඒ සඳහා අත්තිකාරම් මුදලක් වශයෙන් රුපියල් 10,000 ක් ද, ලියාපදිංචි ගාස්තු ලෙස රුපියල් 1000 ක් සහ ලිපිද්‍රව්‍ය ගාස්තු ලෙස රුපියල් 400 ක් ලබා දිය යුතු බවටත් මාර්ග සංවර්ධන අධිකාරියේ නිලධාරින් විසින් වෙළදුන්ට උපදෙස් දී ඇති බවටයි රජරට දූෂණ විරෝධී සංගමය පෙන්වා දුන්නේ.

පවතින ආර්ථික දුෂ්කරතා හමුවේ මෙලෙස බදු අයකිරීමට දරන උත්සහය ඉතා අසාධාරණ බවයි වෙළඳුන් ප්‍රකාශ කළේ.

Share This Article