මසකට පැය 13ක් - රුපියල් 350ක ගෙවීමකුත් ,

ශ්‍රී ලංකා විශ්ව විද්‍යාල ඉතිහාසයේ නව පරිච්ඡේදයක් සනිටුහන් කරමින්, පේරාදෙණිය විශ්ව විද්‍යාලයේ සියලු සිසුන්ට මසකට පැය 13ක අර්ධකාලීන රැකියා අවස්ථාවක් ලබාදීමට විශ්ව විද්‍යාල පාලන අධිකාරිය තීරණය කර තිබෙනවා.

මෙම වැඩපිළිවෙල යටතේ එක් සිසුවෙකු සේවය කරන පැයක කාලයක් සඳහා රුපියල් 350ක ගෙවීමක් කිරීමටද නියමිතයි. සරසවිය තුල අනධ්‍යයන සේවා සැපයීම හා අන්තර්ජාලය ඔස්සේ සිදුකරන දැනුම් හුවමාරුව සඳහා සිසුන්ට මෙම අර්ධකාලීන රැකියා ලබාදීමට නියමිත බව පේරාදෙණිය විශ්ව විද්‍යාලයේ උපකුලපති එම්. ඩී ළමාවංශ සඳහන් කළා.

කෙසේ වෙතත්, මේ සඳහා සිසුන් 170දෙනෙකු පමණ දැනටමත් ඉල්ලුම් කර ඇති බවද ඔවුන්ට පත්වීම් ලිපි ප්‍රදානය ඔක්තෝබර් මස පළමුවැනිදා සිදු කිරීමට නියමිත බවද සඳහන්.

මේ දින වල රට තුළ පැන නැගී ඇති සමාජ හා ආර්ථික අර්බුදය හමුවේ සිසු දරුවන් විශාල ආතතියකට පත්ව ඇති බවත්, නව වැඩපිළිවෙල යටතේ සිසුන්ට යම් ආදායමක් ලැබෙන අතරම සිසුන් තුළ ඇති ඒකාකාරී බවෙන් මිදීම සඳහා ද මෙය මහඟු පිටුවහලක් වනු ඇති බවත් උපකුලපතිවරයා වැඩිදුරටත් සඳහන් කළා.

උපුටා ගැනීම - ලංකාදීප