පමාවී තිබූ රජයේ සේවකයන්ගේ විශ්‍රාම පාරිතෝෂිකය - ඉක්මනින් ගෙවීමට අනුමැතිය|Hiru TV Blog

පමාවී තිබූ රජයේ සේවකයන්ගේ විශ්‍රාම පාරිතෝෂිකය - ඉක්මනින් ගෙවීමට අනුමැතිය

Wednesday, 07 September 2022 - 12:21 | Views - 3,151

මෙතෙක් පමාවී තිබූ රජයේ සේවකයන්ගේ විශ්‍රාම පාරිතෝෂිකය ගෙවීම ස‍ඳහා අග්‍රාමාත්‍ය දිනේෂ් ගුණවර්ධන ඉදිරිපත් කළ කැබිනට් පත්‍රිකාවට අමාත්‍ය මණ්ඩල අනුමැතිය හිමිව තිබෙනවා.

ඒ අනුව, 2021 වර්ෂයට අදාළව මේ වනවිට ගෙවිය යුතුව පවතින විශ්‍රාම පාරිතෝෂික ගෙවීම සඳහා අවශ්‍ය අරමුදල් මහා භාණ්ඩාගාරය විසින් මෙම වසරේ ඔක්තෝබර් මාසය අවසානයට පෙර විශ්‍රාම වැටුප් දෙපාර්තමේන්තුවට ලබා දීමටද, 2022 වර්ෂය සඳහා ගෙවිය යුතුව පවතින විශ්‍රාම පාරිතෝෂික මුදල් ගෙවීම සඳහා අවශ්‍ය වන අරමුදල් ප්‍රමාණය මාස 6ක් තුළ විශ්‍රාම වැටුප් දෙපාර්තමේන්තුව වෙත ලබාදීටද අනුමැතිය හිමිව ඇති බවටයි සඳහා වන්නේ.

එමෙන්ම, මෙම විශ්‍රාම පාරිතෝෂිකය ගෙවීමේ ක්‍රමවේදය තිරසාරව පවත්වාගෙන යාම සම්බන්ධයෙන් කරුණු අධ්‍යයනය කර යෝජනාවලියක් ඉදිරිපත් කිරීම සඳහා, හය දෙනෙකුගෙන් සමන්විත කමිටුවක් පත් කිරීමටද අමාත්‍ය මණ්ඩල අනුමැතිය හිමි ව තිබෙනවා.

විශ්‍රාම පාරිතෝෂිකය සම්බන්ධයෙන් වන මෙම කමිටුවේ නිර්දේශ සහිත වාර්තාව, මාසයක් තුළ, මුදල්, ආර්ථික ස්ථායිකරණ සහ ජාතික ප්‍රතිපත්ති අමාත්‍යවරයා මගින්, අමාත්‍ය මණ්ඩලය වෙත ඉදිරිපත් කළ යුතු බවද අමාත්‍ය මණ්ඩලය තීරණය කර තිබෙනවා.

පසුගිය කාලය පුරා රට තුළ පවතින ආර්ථික අස්ථායිතාව හමුවේ, රජයේ නිලධාරීන් විශ්‍රාම ගැනීමෙදී ඔවුන්ට ගෙවනු ලබන විශ්‍රාම වැටුප් පාරිතෝෂිකය ගෙවීමට රජයට හැකියාව ලැබුණේ නැත.

කෙසේවුවද, මෙම පාරිතෝෂිකය නොගෙවීම හේතුවෙන් විශ්‍රාමික ප්‍රජාව විශාල පීඩනයකින් පසුවූ අතර ඒ සම්බන්ධයෙන් වන මැසිවිලි රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යංශයට ද නිරන්තරයෙන් ඉදිරිපත් වූ බවද සඳහන්.

Share This Article