හෙට අඩුවෙන වැසි අනිද්දා සිට යළි වැඩිවෙයි (Video)|Hiru TV Blog

හෙට අඩුවෙන වැසි අනිද්දා සිට යළි වැඩිවෙයි (Video)

Thursday, 01 September 2022 - 14:53 | Views - 441

දිවයිනේ ප්‍රදේශ කිහිපයකට බලපා ඇති වැසි සහිත කාලගුණය යම් අඩුවිමක් හෙට දිනයේ සිදු වුවත්, යලි අනිද්දා සිට පවතින වැසි තත්ත්වයේ වැඩිවීමක් අපේක්ෂා කරන බව කාලගුණ විද්‍යා දෙපාර්තමේන්තුව ප්‍රකාශ කළා.

ඒ අනුව ඉදිරි පැය කිහිපයක තුළ බස්නාහිර, සබරගමුව, මධ්‍යම, වයඹ සහ උතුරු පළාත්වල ඇතැම් ස්ථානවලට මිලිමීටර් 100 ක පමණ තද වැසි අපේක්ෂා කරන බවයි එම දෙපාර්තමේන්තුව නිකුත් කළ නිවේදනයේ දැක්වෙන්නේ.

මේ අතර, අද පෙරවරු 8.30 අවසන් වු ගෙවුණු පැය 24 තුළ මීලීමිටර් 247 යි දශම 1 ක වැඩිම වර්ෂාපතනය රත්නපුර දිස්කත්‍රිකයෙන් වාර්තා වනවා.

එම නිසා, කළු ගඟේ අතු ගංගාවක් වන කුඩා ගඟ පිටාර ගැලිම නිසා රත්නපුර දිස්ත්‍රික්කයේ බුලත්සිංහල සහ පාලින්ද නුවරට සුළු ගංවතුර තත්ත්වයක් හට ගෙන තිබෙනවා.

තවදුරටත් කඵ ගඟේ ඉහළ ජල පෝෂක ප්‍රදේශ වලට වැසි ඇති වන බැවින් පහත් බිම්වල සිටින ජනතාව ඒ සම්බන්ධයෙන් අවධානයෙන් පසුවන ලෙසටයි වාරිමාර්ග දෙපාර්තමේන්තුව දැනුම් දෙන්නේ.

එසේම, ගිංගඟේ ජල මට්ටම ද ඉහළ යාම නිසා ගාල්ල - බද්දේගම ප්‍රදේශයේ පහත් බිම් සහ මාපලගම - පිටිගල ප්‍රධාන මාර්ගයේ ස්ථාන කිහිපයක් ජලයෙන් යට වි තිබෙනවා.

මහවැලි, කැළණි, නිල්වලා යන ගංඟා වල ඉහළ ජල පෝෂක ප්‍රදේශ වලට අද දිනයේ අඛණ්ඩව වැසි ඇති වුවහොත් එම ගංගා වලද ජල මට්ටම් ඉහළ යා හැකියි.

එමෙන්ම, කුකුලේ ගග ජලාශයේ වාන් දොරටු 2 ක් , දැදුරු ඔයේ වාන් දොරටු 4 ක්, සහ ලක්ෂපානේ වාන් දොරටු 3 ක් සහ පොල්ගොල්ල ජලාශයේ වාන් දොරටු 3 ක් විවෘත කර ඇති බැවින් එම ජලාශ අවට පහත් බිමි වල සිටින ජනතාව සැලකිල්ලෙන් පසු විය යුතු බවයි වාරිමාර්ග දෙපාර්තමේන්තුවේ ආපදා සහ ජල කළමණාකරණ අංශයේ අධ්‍යක්ෂ එස්.පී.සී. සුගීෂ්වර සඳහන් කළේ.

ජල විදුලිබලාගාර ආශ්‍රිත ජලාශ වලට ද සැලකියයුතු වර්ෂාපතනයක් ලැබෙන බවයි ලංකා විදුලි බල මණ්ඩලය සඳහන් කළේ.