වාහන අංක තහඩු යොදාගෙන වංචනික ක්‍රියාවක් - පොලිසියෙන් රියදුරන්ට විශේෂ දැනුම්දීමක්|Hiru TV Blog

වාහන අංක තහඩු යොදාගෙන වංචනික ක්‍රියාවක් - පොලිසියෙන් රියදුරන්ට විශේෂ දැනුම්දීමක්

Friday, 05 August 2022 - 12:26 | Views - 1,192

ගාල්ල, ගාල්ල වරාය, තිස්සමහාරාමය, අහුංගල්ල හා කතරගම යන පොලිස් වසම්වල සිදු වූ යතුරුපැදි අංක තහඩු සොරකම් කිරීම් සම්බන්ධව පැමිණිලි කිහිපයක් පසුගිය දිනවල එම පොලිස් ස්ථාන වෙත වාර්තාවීම සම්බන්ධයෙන් විශේෂ නිවේදනයක් පොලිස් මාධ්‍ය ප්‍රකාශක කාර්යාලය විසින් නිකුත් කර තිබෙනවා.

මේ සම්බන්ධයෙන් අදාළ පොලිස් ස්ථාන මගින් විමර්ශන සිදු කිරීමේ දී ජූලි 31 වැනි දින රත්ගම පොලිස් වසමේ දී පුද්ගලයෙකු වෙඩි තබා ඝාතනය කිරීමට පැමිණි යතුරුපැදියෙ අංක තහඩුව ජූලි මස 05 වැනි දින අහුන්ගල්ල පොලිස් වසමේ දී සොරාගෙන ඇති බවට තොරතුරු අනාවරණය වී තිබෙනවා.

එමෙන්ම ජුනි මස 26 වැනි දින මිද්දෙණිය පොලිස් වසමේ දී මෝටර් රථයකින් පැමිණ වෙඩිතබා මනුෂ්‍ය ඝාතනයක් සිදු කිරීමේ අපරාධය සඳහා සැකකරුවන් පැමිණ තිබු මෝටර් රථයේ සවිකර තිබූ අංක තහඩු ද බේරුවල ප්‍රදේශයේ දී සොරාගන්නා ලද අංක තහඩු බවට අනාවරණය වී තිබෙනවා.

පසුගිය සති කිහිපය තුළ වාර්තා වූ වෙඩි තබා මනුෂ්‍ය ඝාතන සිදුවීම්වලට අදාළව අපරාධකරුවන් අත් අඩංගුවට ගැනීම සඳහා පොලිසිය විසින් විමර්ශන සිදු කිරීමේ දී සැකකරුවන් පැමිණ තිබූ මෝටර් රථ හා යතුරුපැදිවල ලියාපදිංචි අංක තහඩු ව්‍යාජ ඒවා බවත් ඒවා ඉහත සඳහන් කළ පරිදි විවිධ ප්‍රදේශවල යතුරුපැදිවලින් සොරා ගන්නා ලද අංක තහඩු බවටත් නිරීක්ෂණය වී ඇති බවයි පොලිස් මාධ්‍ය ප්‍රකාශක කාර්‍යාලය පවසන්නේ.

මෙම ආකාරයට යතුරුපැදි අංක තහඩු සොරකම් කිරීම් තවදුරටත් මෙවැනි අපරාධ සිදු කිරීමට පූර්ව සැලසුමක් ද යන්න බවට පොලිසිය සැක කරනවා.

එබැවින් තම යතුරුපැදි හෝ වාහන මාර්ගයේ හෝ වෙනත් ස්ථානවල නවතා යාමේ දී දැඩි අවධානයෙන් කටයුතු කරන ලෙසටයි රියැදුරන්ගෙන් පොලිසිය ඉල්ලා සිටින්නේ.

Share This Article