අවිධිමත් රාජ්ය තාන්ත්රික විදේශ ගමන් බලපත්රයක් සන්තකයේ තබාගැනීම සම්බන්ධයෙන් වසර දෙකක සිර දඬුවම් නියම වු පාර්ලිමේන්තු මන්ත්රී විමල් වීරවංශගේ බිරිඳ වන ශෂී වීරවංශගේ ඇප ඉල්ලීම සළකා බැලීම කොළඹ මහේස්ත්රාත් අධිකරණය විසින් යළි හෙට (31) දිනය දක්වා කල් තැබුණා.
ඇයගේ නීතීඥවරුන් විසින් පසුගිය සිකුරාදා ඉදිරිපත් කළ අභියාචනය ප්රධාන මහේස්ත්රාත් නන්දන අමරසිංහ ඉදිරියේ අද (30) කැඳවූ අවස්ථාවේ මෙම අභියාචනාව සම්බන්ධයෙන් සිය ස්ථාවරය පැහැදිලි කරන ලෙස දන්වමින් ප්රධාන මහේස්ත්රාත්වරයා නීතිපතිවරයා වෙත නොතීසි ද නිකුත් කළා.
අදාළ අභියාචනය සළකා බැලීමේ අවස්ථාව සඳහා සිරදඬුවම් නියම වූ පාර්ලිමේන්තු මන්ත්රී විමල් වීරවංශගේ බිරිඳ වන ශෂී වීරවංශ ද බන්ධනාගාර නිලධාරීන් විසින් කොළඹ මහේස්ත්රාත් අධිකරණයට රැගෙනවිත් තිබුණා.
මේ අතර පාර්ලිමේන්තු මන්ත්රී විමල් වීරවංශ ඇතුළු විත්තිකරුවන් හය දෙනෙකුට එරෙහිව ගොනුකර ඇති නඩුව අගෝස්තු මස 29 වනදා දක්වා කල් තැබීමට කොළඹ ප්රධාන මහේස්ත්රාත් නන්දන අමරසිංහ නියෝග කළා.
කුරුඳුවත්ත පොලිසිය මගින් හිටපු අමාත්ය විමල් වීරවංශ ඇතුලු පිරිසට මෙම නඩුව පවරා ඇත්තේ 2016 වසරේ එක්සත් ජාතීන්ගේ හිටපු මානව හිමිකම් මහකොමසාරිස් සෙයිද් අල් හුසේන් කුමරු මෙරට සංචාරය කළ අවස්ථාවේදී කොළඹ, තුම්මුල්ලේ පිහිටි එක්සත් ජාතීන්ගේ කොළඹ ප්රධාන කාර්යාලය ඉදිරිපිට මාර්ගවල උද්ඝෝෂණය කිරීම තුළින් මහජන පීඩාවක් සිදු කළේ යැයි චෝදනා කරමින්.