කෙටි කෑම මිලත් නැවතත් ඉහළට
Thursday, 26 May 2022 - 15:11 | Views - 8,235

ඉන්ධන මිල ඉහළ යාම සහ ගෑස් අර්බුදය හේතුවෙන් කොළඹ ඇතුළු තදාසන්න නගරවල සියළුම ආපනශාලාවල කෙටි කෑම වර්ගවල මිල ගණන් යළිත් වරක් අධික ලෙස ඉහළ ගොස් තිබෙනවා.
බිත්තර රොටී, පරාටා, රෝල්ස්, එළවළු රොටී, ආප්ප, මාළු පාන් සහ අනෙකුත් කෙටි කෑම මෙලෙස ඉහළ ගොස් ඇති බවටයි වාර්තා වන්නේ.
කෙටි ආහාරවලට අමතරව ප්ලේන්ටියක සහ කිරි තේ කෝප්පයක මිල ද ඉහළ ගොස් තිබෙනවා.
බිත්තර රොටියක සහ තෝසයක මිල රුපියල් 100 දක්වාත් පරාටයක් රුපියල් 50 දක්වාත් ඉහළ ගොස් ඇති බවටයි ආපනශාලා හිමියන් ප්රකාශ කළේ.
බත් පැකට්ටුවක මිල ඉහළ යාමත් සමග පාරිභෝගික ජනතාව උදෑසන ආහාර වේල සඳහා කෙටි කෑම පරිභෝජනයට ගැනීමට පුරුදු වී සිටියා.
කෙසේ වෙතත්, බිත්තර රොටියක් ව්යංජනයක් සමග රුපියල් 150 දක්වාත් පරාටා 3ක් ව්යාංජනයක් සමග රුපියල් 200 දක්වාත් ඉහළ ගොස් ඇත්තේ ගෑස් නො මැති වීම සහ මිල ඉහළ යාම හේතුවෙන්.
මීට අමතරව පාන් භාගයක් සහ ව්යංජනයක මිල ද රුපියල් 170 දක්වා ඉහළ ගොස් තිබෙනවා.
එමෙන්ම, රෝල්ස්, එළවළු රොටි, බිත්තර පාන් සහ සීනි සම්බල් ආදී කෙටි කෑමවල මිල ද රුපියල් 100 දක්වා ඉහළ දැමීමටයි ආපනශාලා හිමියන් කටයුතු කර ඇත්තේ.
බිත්තර ආප්පයක මිල රුපියල් 100 දක්වාත්, ආප්පයක මිල රුපියල් 50 දක්වාත් ඉහළ දැමීමට පියවර ගෙන තිබෙනවා.
කෙටි කෑමවලට අමතරව ප්ලේන්ටියක මිල රුපියල් 50 දක්වාත්, කිරි කෝප්පයක මිල ද රුපියල් 100 දක්වා ඉහළ ගොස් තිබෙනවා.
එක්සත් ජාතික ස්වයං රැකියා වෙළද සංගමයේ සභාපති ප්රදීප් චාල්ස් සඳහන් කළේ අමුද්රව්යවල මිල ඉහළ යාම, ගෑස් අර්බුදය ඇතුළු තවත් ගැටලු හේතුවෙන් ආපනශාලා සියයට 65කට වැඩි සංඛ්යාවක් වසා දමා ඇති බවයි.
එමෙන්ම, බිස්කට් වර්ග, යෝගට් වැනි ජනතාව එදිනෙදා පරිභෝජනය කරන ආහාර රැසක ද මිල ඉහළ ගොස් තිබෙනවා.
Share This Article