බස්නාහිර ප්රදේශය භාර ජ්යේෂ්ඨ නියෝජ්ය පොලිස්පති දේශබන්දු තෙන්නකෝන්ට අරගලකරුවන් පිරිසක් විසින් පහර දී තිබෙනවා.
මෙම පහර දීම සිදු වී ඇත්තේ, කොළඹ ගංගාරාම විහාරස්ථානය අසල දී බව යි පැවසන්නේ.
සිවිල් ඇඳුමින් සැරසී ගංගාරාම විහාරස්ථානය අසලට පැමිණි ජ්යේෂ්ඨ නියෝජ්ය පොලිස්පතිවරයාට ඒ අවස්ථාවේ ඒ අසල සිටි සිවිල් වැසියන් පිරිසක් විසින් පහර දී තිබෙනවා.
ජ්යේෂ්ඨ නියෝජ්ය පොලිස්පතිවරයා පැමිණි වාහනය හරස් කරන මෙම පිරිස සමඟ කතාබහ කිරීමට වාහනයෙන් බිමට බට ජ්යේෂ්ඨ නියෝජ්ය පොලිස්පතිවරයා කටයුතු කරන අවස්ථාවේ එම පිරිස ඔහුට දැඩි ප්රහාරයක් එල්ල කරනවා.
පහර දෙන පිරිසගෙන් බේරීම සඳහා ජ්යේෂ්ඨ නියෝජ්ය පොලිස්පති දේශබන්දු තෙන්න්කෝන් දිව යන අතර, ඉන් පසුව යි තත්ත්වය පාලනය කිරීම සඳහා පොලිසිය විසින් අහසට වෙඩි තබා ඇති බව යි වාර්තා වන්නේ.
මෙම වෙඩිතැබීමත් සමඟ පහර දීමට පැමිණි පිරිස විසිර ගොස් ඇති අතර, ජ්යේෂ්ඨ නියෝජ්ය පොලිස්පතිවරයා වහා ම එම ස්ථානයෙන් ඉවත් කර ගැනීමට ඔහු සමඟ සිටි පොලිස් කණ්ඩායම කටයුතු කළා.
ඊයේ පැවති කොළඹ ගාලු මුවදොර පැවති අරගලයට මහින්ද රාජපක්ෂ හිතවාදීන් විසින් සිදු කළ පහර දීම නිසි ආකාරයට පාලනය කිරීමට ජ්යේෂ්ඨ නියෝජ්ය පොලිස්පතිවරයා කටයුතු නො කළ බවට චෝදනා එල්ල වුණා.
මෙම ප්රහාරයේ ප්රධාන සැලසුම්කරුවකු වන පුත්තලං දිස්ත්රික් පාර්ලිමේන්තු මන්ත්රී සනත් නිශාන්ත සමඟ පිළිසඳරක යෙදෙමින් ගාලුමුවදොර පිටිය දෙසට පැමිණෙන ආකාරයේ ඡායාරූප සමාජ මාධ්යය ඔස්සේ දැඩි ලෙස සංසරණය වුණා.