බිරිඳ මාළු තෝරන අතරතුර සැමියා පෙම් සුව සොයා ගිහින්
Wednesday, 30 September 2020 - 9:34 | Views - 1,709

කාමරයේ ඇඳමත රුපියල් 44000 ක් වටිනා රන් දම්වැල තබා නාන කාමරයට ගිය අවස්ථාවේ තමා සම`ග කාමරයේ සිටි කාන්තාව රන්මාලය ගෙන පැන ගොස් ඇති බව කියමින් ආරච්චිකට්ටුව වෛරන්කට්ටුව පදිංචිකරුවෙක් හලාවත පොලිසියට පැමිණිල්ලක් කර තිබේ.
තමන් තම බිරිය සම`ග හලාවත මාළු වෙළෙඳසලට පැමිණ බිරියට මාළු වෙළෙඳසල ඇතුළට පිටත් කර යවා තමා මාළු වෙළෙඳ සැලට ඇතුල් වන ස්ථානයේ රැඳී සිටි බවත් එවෙලේ වයස අවුරුදු 35 ක පමණ කාන්තාවක් පැමිණ තමාගේ සැමියා නොමැති බවත් දරුවකු සිටින බවටත් කී බව පැමිණිල්ලෙන් කියා ඇත.
ඉන් පසුව ඇය තමාගෙන් රුපියල් 1000 ක් ඉල්ලා කාමරයකට යෑමට කතා කළ බවත් තමා එයට කැමති වී ත්රිරෝද රථයකින් හලාවත හෝටලයකට පැමිණි බවද, එහි කාමරයක් කුලියට ගෙන ඇයත් සමග අඹුසැමියන් ලෙස හැසිරුණු බවද ඉන් අනතුරුව තමාගේ ගෙල බැඳි රුපියල් 44000 ක් වටිනා රන් දම්වැල ගලවා කාමරයේ ඇඳ මත තබා නාන කාමරයට ගිය බවද සඳහන් කර ඇත.
නාන කාමරයේ සිට විනාඩි පහකින් පමණ කාමරයට පැමිණි බවද ඒ එන විට කාමරයේ සිටි කාන්තාව හා රන් දම්වැල නොතිබූ බවද තමා කාන්තාවගේ නම හෝ පදිංචි ස්ථානයක් නොදන්නා බවද පැමිණිල්ලේ දක්වා තිබේ.
හලාවත පොලිසියේ උප පොලිස් පරීක්ෂක ගාමිණී ආදසූරිය මහතා මේ පිළිබඳව විමර්ශන කරගෙන යයි.
Share This Article