"රැකියා සුරකින්න - AI නියාමනය කරන්න" කෘතිම බුද්ධියට එරෙහිව රොබෝවරුන්ගෙන්ම විරෝධතාවක්..|Hiru TV Blog

"රැකියා සුරකින්න - AI නියාමනය කරන්න" කෘතිම බුද්ධියට එරෙහිව රොබෝවරුන්ගෙන්ම විරෝධතාවක්..

Saturday, 12 September 2026 - 10:54 | Views - 157

කෘතිම බුද්ධිය (AI) සහ රොබෝ තාක්ෂණය වේගයෙන් වර්ධනය වීම හමුවේ මිනිස් රැකියා සුරක්ෂිතභාවය වෙනුවෙන් දැඩි නීතිරීති පනවන ලෙස ඉල්ලමින් පෝලන්තයේ වෝර්සෝ නුවර අපූරු විරෝධතාවක් පවත්වා තිබෙනවා.

පෝලන්තයේ ඩිජිටල් කටයුතු පිළිබඳ අමාත්‍යාංශය ඉදිරිපිට පැවැති මෙම සුවිශේෂී විරෝධතාව සඳහා විවිධ මාදිලියේ රොබෝවරුන් 30 දෙනෙකු පමණ එක්ව සිටි බව විදෙස් මාධ්‍ය වාර්තා කළා.

පාබල මානව රූපී (Humanoid) රොබෝවරුන් සහ සිව්පාවුන් බඳු රොබෝවරුන්ගෙන් (Quadrupeds) සමන්විත වූ මෙම කණ්ඩායම කොඩි වනමින්, සටන් පාඨ කියමින් සහ වටරවුම් ලෙස ගමන් කරමින් ඉතා සංකේතාත්මක විරෝධතාවයක නිරත වී තිබෙනවා.

ධ්වනි විකාශක යන්ත්‍ර හරහා “රැකියා ස්ථාන සුරකින්න”, “නීති පැනවීමට කාලයයි” සහ “ප්‍රමාද නොවී නියාමනය කරන්න” වැනි සටන් පාඨ නිකුත් කිරීමට ඔවුන් පියවර ගෙන තිබුණා.

මෙම තාක්ෂණය මේ වන විටත් ප්‍රායෝගික යථාර්ථයක් බව පෙන්වා දීමට තමන් මෙලෙස විරෝධතාවට එක්වූ බව එමෙන්ම මෙම විරෝධතාවට එක්වූ Agibot A3 නමැති මානව රූපී රොබෝවරයෙකු AFP පුවත් සේවයට ප්‍රකාශ කර තිබෙනවා.

කෘතිම බුද්ධිය සහ රොබෝ තාක්ෂණයේ දැවැන්ත පිම්ම නිසා ඉදිරියේදී සමස්ත රැකියා වෙළඳපොළට එල්ල විය හැකි දැඩි බලපෑම පිළිබඳව පුළුල් මහජන කථිකාවතක් ගොඩනැගීමේ අරමුණින් 'Democratism' සංවිධානය මගින් මෙම අපූරු විරෝධතාව සංවිධානය කර තිබෙනවා.

Share This Article